Stoðþjónusta

Aðstoðarskólastjóri fer með yfirumsjón með sérkennslu og stoðþjónustu við Grunnskóla Fáskrúðsfjarðar. Hann sér um að fá greiningar vegna nemenda með sérþarfir. Hann er tengiliður við foreldra og sérfræðinga, s.s. sérfræðinga á skólaskrifstofu, á fjölskyldusviði Fjarðabyggðar, Heilbrigðisstofnun Austurlands, Ráðgjafa- og greiningastöð ríkisins, Barna- og unglingageðdeild (BUGL) og aðrar stofnanir sem við á. Hann er ábyrgðamaður nemendaverndarráðs. Heildarskipulag sérkennslu er á höndum yfirmanns sérkennslu og sérkennara.

Teymi eru starfandi vegna nemenda með sérþarfir og í þeim sitja alltaf, stjórnandi, umsjónarkennarar og foreldrar. Auk þeirra, eftir þörfum hverju sinni, sérkennari, sérfræðingar frá fjölskyldusviði Fjarðabyggðar og/eða frá Skólaskrifstofu Austurlands og aðrir þeir aðila sem koma að stuðningi við nemanda. Stuðningsfulltrú viðkomandi nemandi, í samstarfi við umsjónakennara og sérkennara, styður við nám og athafnir daglegs lífs nemanda með sértækar þarfir. Stuðningurinn er einstaklingsmiðaður.

Farsæld barna eða samþætting þjónustu í þágu farsældar barna eru lög sem öll sveitarfélög, stofnanir og þjónustuveitendur sem vinna með börnum og ungmennum á landinu taka þátt í.

Hvert og eitt sveitarfélag þróar sitt verklag. Verkefnið kemur frá lögum sem eru gjarnan kölluð farsældarlögin eða lög um samþættingu þjónustu í þágu farsældar barna.

Markmiðið með lögum um samþætta þjónustu er að bæta enn frekar þjónustu við börn og fjölskyldur með því að stuðla að samvinnu og samstarfi þjónustuveitenda barna og fjölskyldna.

Með því að tengja þjónustuna saman og vinna í sameiningu að farsæld barna (að samþætta þjónustuna) verður auðveldara fyrir börn og foreldra að fá aðstoð við hæfi.

Nálgast má nánari upplýsingar á vef Farsældar barna, einnig eru þar skýringar á hugtökum.

Sérkennsla

Sérkennslu innan skólans er sinnt af nokkrum. Þeir sem taka að sér sérkennslu vinna í nánu samstarfi við deildarstjóra sérkennslu og umsjónarkennara með ákveðna nemendur sem annaðhvort fá stuðning inn í bekk eða fá einstaklingsstuðning hjá sérkennara í lesveri. Einnig vinnur bæði sérkennari og yfirmaður sérkennslu með kennsluráðgjafa Fjölskyldusviðs Fjarðabyggðar þegar kemur að greiningum nemenda.

Námsráðgjöf

Náms- og starfsráðgjafi Grunnskóla Fáskrúðsfjarðar er Sigrún Eva Grétarsdóttir og starfar hún á öllum skólastigum.

Viðtal við náms- og starfsráðgjafa stendur öllum nemendum skólans til boða.  Nemendur og forráðamenn þeirra geta óskað eftir viðtali hvenær sem er en auk þess geta umsjónarkennarar, sérkennarar, deildarstjórar og nemendaverndarráð vísað nemendum til námsráðgjafa. Náms- og starfsráðgjafi er málsvari nemenda og trúnaðarmaður og aðstoðar nemendur við að leita lausna á sínum málum.

Viðtalstímar eru mánudaga og þriðjudaga eftir samkomulagi bæði fyrir nemendur og forráðamenn. Nemendur og forráðamenn þeirra eru hvattir til að nýta sér þjónustu náms- og starfsráðgjafa. Námsráðgjafi er bundinn trúnaðarskyldu varðandi allar upplýsingar sem hann fær um nemendur og/eða nemendahópa.

Einstaklingsnámskrár

Þroskaþjálfar og deildarstjóri sérkennslu vinna einstaklingsnámskrár og áætlanir fyrir nemendur sem á því þurfa að halda. Einstaklingsnámskrá tekur bæði til náms- og félagslegra þátta. Foreldrar samþykkja einstaklingsnámskrá með undirritun sinni.