Fréttir fyrri ára

Skólaárið 2009-2010

 

Skólaárið 2008-2009

 

Skólaárið 2007-2008

 

Skólaárið 2006-2007

Enn eldri fréttir

Vor 2006

(24.05.06) Skólaferðalag 9. og 10. bekkjar

Nemendur í 10. bekk fóru í 10 daga skólaferðalag til Malorca með viðkomu í Danmörku.  Ferðin heppnaðist í alla staði mjög vel.   Þessir nemendur fóru ekki í skólaferðalag í 9. bekk eins og hefð er fyrir við GF.

Nemendur í 9. bekk fóru í skólaferðalag til Danmerkur 22.-28. maí, þau dvöldu í Lalandia á Lálandi.   Ferðin gekk mjög vel og var ferðast talsvert um í bílaleigubílum m.a. skroppið til Þýskalands og Kaupmannahafnar þar sem farið var í Tívolí og Strikið skoðað.  Það er aldrei að vita nema þau hafi lært eitt og eitt nýtt orð í dönsku í leiðinni.

(24.05.06)  Vordagar í GF

Fimmtudagur 25. maí er uppstigningardagur og því frí í skólanum.

Föstudagur 26. maí er starfsdagur kennara og frí hjá nemendum. 

Mánudagur 29. maí er ferðadagur

Yngsta stig fer í rútuferð til Stöðvarfjarðar þar sem Steinasafn Petru verður skoðað og síðan verður farið í sund á Breiðdalsvík og snædd pizza á Hótel Bláfelli.  Nemendur þurfa að hafa með sér sundföt og 700 krónur fyrir pizzunni og sundinu.    Lagt verður af stað frá skólanum kl. 8:00 og er heimkoma áætluð kl. 13:30

Miðstig, 7. bekkur, 8. bekkur og 10. bekkur fara í rútuferð á Egilsstaði þar sem Minjasafnið verður skoðað og einnig verður farið í sund.  Á heimleið verður snædd pizza á Tærgesen.  Nemendur þurfa að hafa með sér sundföt, hollt og gott nesti og 750 krónur fyrir sundinu og pizzunni. Lagt verður af stað frá skólanum kl. 9:00 og  áætluð heimkoma er um kl. 15:00.

9. bekkur fær að lúra á mánudeginum því þau koma heim frá Danmörku aðfaranótt  29. maí.

Þriðjudagur 30. maí.    Leikir, þrautir, eggjafall og kaffihús.

Allir mæti í skólann kl. 8:00 og farið verður í ýmsa leiki og þrautir sem nemendur eru búnir að velja sér.  Nemendur þurfa að koma klæddir eftir veðri.  Hádegishlé verður tekið milli kl 12 og 13 og síðan er haldið áfram til kl. 14:30.  Þeir sem taka þátt í veiði þurfa að hafa veiðistöng.  Eggjafall verður þennan dag og hér á eftir er nánari skýring á því.

Eggjafall

Markmiðið með eggjafalli er búa svo vel um 2 egg að þó að þau séu látin falla til jarðar úr nokkurri (2-3 m) hæð þá brotni þau ekki.

Reglur:       Eggin þurfa að vera tvö í sömu öskjunni.

                 Askjan (umbúðirnar) má ekki vera meiri en 20x20x20 cm.

Eggin þurfa að vera hrá.  Athugið að gengið verður úr skugga um það eftir að eggin hafa verið látin falla.

Þetta er aðeins gert til skemmtunar og engin verðlaun eru í boði, einungis ánægjan af að hafa hannað svo flottar umbúðir að egg brotni ekki í þeim þó þeim sé fleygt fram af húsvegg.

Miðvikudagur 31. maí.  Frágangur, notalegheit, grill, gleði og skólaslit

Allir mæti í skólann kl 8:00.  Umsjónarkennarar eiga stund með nemendum sínum til kl 09:30.  Þá verður farið út og farið í ýmsa leiki, nemendur, kennarar og foreldrar.  FORELDRAR  eru hvattir til að mæta og vera með.  Grillað verður í boði skólans.  Áætlað að þessu ljúki um 12:00 og síðan eru skólaslit í Skrúð kl 18:00. 

(18.05.06)  Tilkynning fá Foreldrafélagi GF

Foreldrafélag GF vill minna á að með fréttabréfinu sem við gáfum út kom beiðni um framlag til félagsins kr.500.- pr.heimili. Ekki hafa verið góðar heimtur á þessu framlagi og viljum við endilega setja bankanúmerið okkar hér fram ef einhver ætlar að borga.
Reikn.nr. 0171-05-62006  kt.681088-6369. Þetta er hugsað til að standa straum af þeim kostnaði sem tilfellur við rekstur svona félags.

Svo óskum við öllum gleðilegs sumar og hlökkum til samstarfs á næsta skólaári.                       Stjórnin

(16.05.06)  Hjóladagur

Fimmtudaginn 18. maí verður hjóladagur hjá okkur í samstarfi við Lögregluna á Fáskrúðsfirði og Slysavarnardeildina Hafdísi frá kl 11:10-12. Farið verður í hjólaþrautir og löggan skoðar hjól þeirra sem vilja. Yngsta stig og Miðstig tekur allt þátt í hjóladeginum og þeir sem vilja í eldri bekkjum.

(11.05.06)  Hjólreiðar

Síðustu daga hafa nemendur og starfsfólk verði mjög dugleg að nota hjóla til að ferðast úr og í skóla.  Til að hjólreiðarnar verði skemmtilegar er nauðsynlegt að við förum öll eftir ákveðnum reglum.  Þeir sem nota hjól við skólann noti sitt eigið hjól og séu með hjálm. Ekki er ætlast til að hjólað sé í leik á malbiki framan við útidyr að austan. Hins vegar má hjóla annars staðar á skólalóðinni en hjólreiðafólk þarf að gæta að tillitsemi við gangandi vegfarendur og víkja fyrir bílum.

(10.05.06)  Námsmat og vorpróf 2006

Eins og allir vita vonandi erum við í GF að vinna að breyttu námsmati.  Því verða ekki hefðbundin vorpróf í öllum fögum, en þó í einhverjum.

Vegna tímasetningar á skólaferðalögum 9. og 10. bekkjar þá breyttum við prófadögum hjá þeim og verða próf hjá þeim sem hér segir:

10. bekkur:   

Athugið að prófin verða tekin á skólatíma fyrir hádegi og því er kennsla að öðru leyti. Skóladagur 10. bekkinga verður frá 8-12 þessa daga nema 24. maí er munnlegt próf í ensku eftir hádegi.

22. maí mánudagur                                          danska

23. maí þriðjudagur                                           náttúrufræði

24. maí miðvikudagur                                        íslenska

24. maí miðvikudagur eftir hádegi                       munnleg enska

9. bekkur:

Athugið að prófin verða tekin á skólatíma fyrir hádegi og því er kennsla að öðru leyti. Skóladagur 9. bekkinga verður frá 8-12 þessa daga.

15. maí  mánudagur                                          danska

16. maí þriðjudagur                                           þjóðfélagsfræði

17. maí miðvikudagur                                        munnleg enska

18. maí fimmtudagur                                         íslenska

19. maí föstudagur                                            náttúrufræði

Próf hjá 7. og 8. bekk verða á áður auglýstum prófadögum 18. - 24. maí. Prófin verða tekin á skólatíma fyrir hádegi og því er kennsla að öðru leyti. Skóladagur 7. og 8. bekkinga verður frá 8-12 þessa daga.

8. bekkur:

18. maí fimmtudagur                                         danska

19. maí föstudagur                                            enska

22. maí mánudagur                                          

23. maí þriðjudagur                                            íslenska fyrir hádegi og tölvur eftir hádegi

24. maí miðvikudagur                                         landafræði

 7. bekkur:

18. maí fimmtudagur                                        danska

19. maí föstudagur                                           

22. maí mánudagur                                          

23. maí þriðjudagur                                           íslenska fyrir hádegi og tölvur eftir hádegi

24. maí miðvikudagur                                        enska

Á Miðstigi og Yngsta stigi verða ekki hefðbundin próf og því verður kennsla með “eðlilegum” hætti og stundatafla þeirra breytist EKKI.

Minnum einnig á að 26. maí er starfsdagur kennara og að hinir FRÁBÆRU VORDAGAR  skólans verða 29. og 30. maí.   Grill og gleði síðan að morgni 31. maí og skólaslitin seinnipartinn.

(08.05.06) Fréttir frá  Yngsta stigi

Viðurkenningar fyrir þátttöku í teiknisamkeppi Landsvirkjunar

Nemendur Yngsta stigs tóku þátt í teiknisamkeppni á vegum Landsvirkjunar í vetur. Þau teiknuðu myndir við smásöguna um Rabba rafeind sem er eftir Yrsu Sigurðardóttir. Landsvirkjun sendi þeim öllum bol í þakklætisskyni fyrir þátttökuna.  Tveir nemendur, þau Sigurbjörg og Alfreð Steinn voru svo heppin að vinna í samkeppninni og fara þau og leggja hornstein að Kárahnjúkavirkjun með forseta Íslands næst komandi föstudag, þann 12. maí.

Yngstu nemendurnir fengu reiðhjólahjálma að gjöf

Tveir lögreglumenn komu í heimsókn og afhentu hjálma sem eru gjöf frá Kiwanishreyfingunni á Íslandi til allra 7 ára barna í landinu . Þeir hjálpuðu nemendum að stilla þá rétt og ræddu um mikilvægi hjálmanotkunar við nemendur.

Heimsókn í vinnubúðirnar í Haga Reyðarfirði

Fimmtudaginn 27. apríl fóru nemendur á Yngsta stigi í rútuferð ásamt elsta árgangi leikskólans í heimsókn í Haga, vinnubúðirnar við álverið í Reyðarfirði.  Þær Brynhildur Einarsdóttir og Þórunn María Þorgrímsdóttir sem starfa hjá ESS tóku vel á móti okkur. Boðið var upp á pítsu og gos í þakklætisskyni fyrir myndir sem nemendur teiknuðu fyrir þau í tengslum við fiskidaga sem eru í vinnubúðunum þessa dagana.  Einnig fengu allir páskaegg að gjöf.

Allir skemmtu sér hið besta og nokkrir krakkar prufuðu enskukunnáttu sína (og þeirra) og “spjölluðu” við starfsfólk.

(27.04.06) Vel heppnuð Árshátíð GF

Árshátið Gf var haldin miðvikudagskvöldið  26. apríl í félagsheimilinu Skrúð.  Þar voru sýndir leikþættir bæði klassískir og frumsamdir, það var sungið og dansað, ýmsar útgáfur af stuttmyndum voru sýndar. Á myndböndunum voru m.a. leikþættir sem síðan voru fléttaðir inn í leikatriði á sviðinu, á öðrum myndböndum sást þegar samnemendur og bæjabúar voru hrekktir góðlátlega í anda "punked" og loks sáum við brot úr frægri teiknimynd sem var búið að talsetja upp á nýtt.  Mikil vinna liggur að baki öllum þessum atriðum hjá nemendum og óskum við þeim til hamingju með vel heppnaða skemmtun.

Í hléi seldu 9. bekkingar kaffi, pizzasnúða og kleinur, með aðstoð foreldra.    Loks má geta þess að á árshátíðinni voru vígðir nýir glæsilegir stólar í félagsheimilin sem reyndust mjög vel.

Dagsetningar samræmdra prófa vorið 2006.

Gleðilegt sumar

(18.04.06) Árshátíð GF

verður haldin miðvikudaginn 26. apríl kl. 19:30 í Skrúð, aðgangseyrir er kr. 700 fyrir fullorðna.  Selt verður kaffi í hléi. Allar tekjur af árshátíðinni renna í ferðasjóð 9. bekkjar.  Allir velkomnir.

(05.04.06)
Margt er um að vera hjá nemendum og starfsfólki Grunnskóla Fáskrúðsfjarðar þessa dagana

Tónlist fyrir alla

Föstudaginn 7.apríl eiga allir nemendur að mæta í Skrúð kl: 08:00 þangað ætlar Egill Ólafsson ásamt fríðu föruneyti að koma og flytja nokkur lög fyrir okkur. Foreldrar eru hjartanlega velkomnir með börnum sínum.  Að loknum tónleikunum er hefðbundin kennsla. 

Skíðaferð

Við í GF fórum í skíðaferð í Oddsskarðið þriðjudaginn 4. apríl.  Allt starfsfólk og langflestir nemendur fóru með nesti og skíðaútbúnað af ýmsu tagi með í för.  Við fengum hið besta veður, hitinn yfir frostmarki og blankalogn. Báðar lyfturnar voru opnar og renndu allir sér af mikilli snilld, á skíðum, brettum og snjóþotum allt til kl 16:00.  Margir nemendur stigu þarna á skíði í fyrsta skipti enda ekki verið mikill skíðasnjór síðustu árin.  Nemendur okkar voru skólanum til mikils sóma og við nutum öll ferðarinnar í botn. 

Lokahátíð Stóru Upplestarkeppninnar  í 7. bekk

var haldin á Breiðdalsvík, þriðjudaginn 4. apríl.  Fulltrúi GF Sindri Már sigraði í keppninni sem var samkvæmt venju mjög jöfn og margir góðir upplesarar sem þar komu fram.   Þess má til gamans geta að þetta er þriðja árið í röð sem fulltrúar GF ná fyrsta sæti í þessari keppni, í fyrra var það Tanja Rún og þar áður Valtýr Aron. 
Til hamingju með árangurinn Sindri Már. 

Fiskar

Í lok mars færði áhöfnin á Ljósafellinu nemendum á Miðstigi sýnishorn af afla síðustu veiðiferðar.  Nemendur unnu síðan með aflann í náttúrufræði, þar reyndust vera  16 tegundir af fiskum auk krabbadýra, krossfiska og ígulkerja. Fiskarnir voru þorskur, ýsa, langa, hrognkelsi, keila, lýsa, sólkoli, sandkoli, skötuselur, karfi, steinbítur, ufsi, tindabikkja, gulllax og svo voru tveir verulega skrýtnir fiskar geirnyt og sænál.

Þegar Miðstigið var búið að skoða fiskana þá fengu nemendur á Yngsta stigi þá til skoðunar og loks börnin  í Leiksskólanum Kærabæ.

Færum við áhöfninni á Ljósafellinu bestu þakkir fyrir.

Páskafrí
Páskafrí hefst mánudaginn 10.apríl og kennsla hefst að nýju miðvikudaginn 19. apríl kl. 9:50.

Gleðilega páska.

(30.03.06)  

Skíðaferð

Veðurspá fyrir þessa vikuna er ekki sérstaklega góð. Það spáir heldur betur eftir helgi og þrátt fyrir árshátíðarannir þá vikuna þá stefnum við á skíðaferð í Oddsskarð þriðjudaginn 4.apríl,- enn og aftur með fyrirvara um gott veður ;)

(27.03.06)  Fundarboð til foreldra, forráðamanna, bæjarbúa og allra þeirra
                       sem stendur ekki á sama um einelti

Fundur um eineltismál verður haldinn fimmtudaginn 30. mars kl. 20:00 – 21:30 í Grunnskóla Fáskrúðsfjarðar

Dagskrá:
1.  Hvað er Olweus?  Kynning á Olweusarverkefninu Gegn einelti

2. Skólinn og einelti.  Hvað er skólinn að gera í málunum?

3. Samfélagið og einelti.  Málin rædd; hvað er hægt að gera og hvert á að snúa sér.

            Hlé   Kaffi og meðlæti

4.  Er einelti í okkar skóla? 
     Niðurstöður úr könnun kynntar:
     Hversu mikið einelti er í okkar skóla, hvernig einelti, hvar og hvenær?

 

               Vonumst til að sjá sem flesta því allir eru hjartanlega velkomnir

 ÞETTA SKIPTIR MÁLI !

(27.03.06)  Skíðaferð

Þriðjudaginn 28. mars er fyrirhugað að fara í skíðaferð í Oddsskarð.  Lagt verður af stað um 9:45 og því kennt fram að frímínútum.   Við komum ekki heim fyrr en seinnipartinn og fer heimkoman alveg eftir veðri og áhuga.

(24.03.06)

Lokahátíð Stóru Upplestarkeppninnar verður á Breiðdalsvík, miðvikudaginn 29.mars kl. 18:00. Fyrir okkar hönd keppa þau Sindri Már og Karín Mist.  Óskum við þeim góðs gengis og skemmtunar. Léttar veitingar verða í hléi, hefðbundin kókómjólk og kleinur.

Bílaumferð við skólann.  Nú er búið að breyta akstursstefnunni við skólann okkar. Komin er einstefna fyrir neðan hann þannig að þegar er keyrt upp á bílaplanið utan við skólann (að austan) þá má ekki snúa við þar heldur þarf að keyra innúr, fyrir neðan aðaldyrnar og niður fyrir innan (vestan). Fyrir innan skólann er ekki ætlast til að sé keyrt upp enda orðin einstefna.

Kennarar á Yngsta stigi.  Heiðrún okkar, umsjónarkennari á Yngsta stigi fer í fæðingarorlof mánudaginn 27. mars. Í hennar stað verður Elsa Sigrún umsjónarkennari á Yngsta stigi ásamt Gunnu. Heiðrúnu þökkum við frábær störf og óskum henni góðs gengis í nýju hlutverki og hlökkum til að fá hana aftur til okkar að ári. Að sjálfsögðu látum við vita hér á heimasíðunni þegar hún verður orðin léttari.
 

(20.03.06) Alda og Skjalda

Það er nýbúið að setja upp vatnsvél í skólanum og hefur hún fengið nafnið  Alda.  Alda er staðsett við hliðina á mjólkurkælinum Skjöldu, framan við kennarastofuna.   Nemendur sem vilja nýta sér vatnsvélina, eru hvattir til að hafa með sér góðan vatnsbrúsa í skólann og merkja hann vel.  Alda býður upp á kalt vatn, aðeins kaldara vatn og kolsýrt vatn.  Skjalda býður aftur á móti, upp á vel kælda mjólk og nemendur geta gerst áskrifendur að mjólk hjá ritara.

(20.03.06) Fréttir af miðstigi

Vikurnar 13.-24. mars er Bylgja í æfingakennslu á yngsta stigi og í staðinn sinna 3 kennaranemar kennslu á miðstigi með Írisi. Þessa daga er ekki hefðbundin kennsla í íslensku- og stærðfræðitímum og einnig verður breyting á í nokkrum ensku- og náttúrufræðitímum.

Þann 15. mars fóru náttúrufræðikennarar ásamt kennaranemunum, með nemendum miðstigs í fjöruferð í tengslum við vinnu með námsefnið Lífríkið í sjó. Ferðin gekk mjög vel nemendur fundu fjölbreyttar lífverur í fjörunni við Vík og einnig var litið þarann, í og við Söxu.   Myndir úr ferðinni og annarri náttúrufræðivinnu í vetur má sjá hér.

Nú er kominn örbylgjuofn í stofuna hjá miðstigi, ef nemendur koma með brauð til hitunar þarf það að vera í plastpoka svo að þrif á ofninum verði léttari. Einnig kom Guðmar Elís með samlokugrill fyrir stuttu síðan og var svo almennilegur að gefa öllum nemendum kost á að hita sér samloku þar. Það gerum við þannig að borð nr. 1 fær að hita í grillinu á mánudögum og svo koll af kolli. Nemendur vita alltaf á föstudögum við hvaða borð þeir muni sitja í næstu viku.

(13.03.06) Stóra upplestrarkeppnin

Fimmtudaginn 9. mars fór Stóra upplestrarkeppnin fram í Grunnskóla Fáskrúðsfjarðar. Þetta var hátíðleg stund þar sem nemendur 7. bekkjar fluttu sögu og ljóð fyrir gesti. Dómnefndar beið erfitt verk að skera úr um hver færi með sigur af hólmi en þó fór svo að lokum að Karín Mist Kjerúlf og Sindri Már Smárason stóðu uppi sem sigurvegarar. Þau koma til með að keppa fyrir hönd skólans á Breiðdalsvík miðvikudaginn 29. mars. Varamenn eru Sigdís Telma Gunnarsdóttir og Birna Dögg Guðmundsdóttir. Við óskum öllum í 7. bekk til hamingju með frábæra frammistöðu. Til gamans má geta þess að Björn Sævar Eggertsson las frumsamið ljóð eftir afa sinn, Björn Þorsteinssson.

Farið í skólann

Ég kveiki mitt ljós er klukkan hrín,

og klæði mig svo með hraði,

því skólabíllinn hann bíður mín,

bráðlega úti á hlaði.

Svo ekið er rakleitt inn á Strönd,

þar árnar í gljúfrum falla,

með ljósadýrðina á hægri hönd,

um Hólmabyggðina alla.

Nú förum við hægt í gegnum göng,

sem gerð voru í fjallið harða,

svo núna er ekki lengur löng,

leiðin á milli fjarða.

Í Dölum og Tungu þarf aðeins á,

þau Elís og Jónu taka.

Við saman þá viljum spyrja spá,

og spjalla án allra raka.

Og heim að skólanum ekið er,

þá allt er í lagi kláru,

en bílstjórinn með okkar föggur fer,

í forstofuna hjá Láru.

                                        Björn Þorsteinsson

(13.03.06) Heimsókn í ME

Mánudaginn 6. mars heimsóttu nemendur okkar úr 9. og 10. bekk Menntaskólann á Egilsstöðum. Kolbrún Björnsdóttir námsráðgjafi tók á móti krökkunum ásamt hressum ME nemum frá Fáskrúðsfirði. Eftir að hafa skoðað húsakynni og lært á þvottavélina hjá þeim Ragnari, Snorra og Ómari kynnti Kolbrún námsframboðið í skólanum og útskýrði samsetningu náms á mismunandi brautum. Síðan komu fulltrúar frá nemendafélaginu og kynntu félagslífið.  Eftir kynningarnar var nemendum boðið upp á hressingu, nýbakaða gersnúða og drykk. Ferðin gekk í alla staði vel og krakkarnir voru til fyrirmyndar.

(28.02.06) Öskudagurinn

Öskudaginn 1. mars verður öskudagsgleði í skólanum. Allir mæta í grímubúningum í skólann á venjulegum tíma og verður hefðbundin kennsla fyrstu tvær kennslustundirnar. Klukkan 10:00 verður farið inn í íþróttahús þar sem börnin slá köttinn úr tunnunni og fara í leiki.  Nemendur taka skólatöskurnar með sér í íþróttahúsið og þangað er hægt að sækja börnin kl. 12:00.

Nemendur í 7. bekk eru að undirbúa öskudagsgöngu eftir hádegið. Þau ætla að mæta við skólann kl. 13:30 og heimsækja síðan nokkur fyrirtæki. Áríðandi er að börnin verði vel klædd undir búningunum.

Athugið gangan eftir hádegi er ekki á vegum skólans.

(28.02.06) Foreldrastarf á Yngsta stigi

Foreldrastarf á Yngsta stigi hefur gengið vel í vetur. Í upphafi skólaársins skiptu kennarar foreldrum í hópa og báðu um að foreldrarnir sæju um einhverja uppákomu fyrir börnin og jafnvel foreldrana í ákveðnum mánuðum. Foreldrarnir hafa tekið vel í þetta og staðið fyrir ýmsri skemmtan. Á dögunum nýtti febrúarhópurinn sér góða veðrið og boðaði nemendur Yngsta stigs og foreldra þeirra í leiki á gervigrasvöllinn. Það er skemmst frá því að segja að allir virtust skemmta sér hið besta og sáust fræknir og föngulegir foreldrar jafnt sem börnum sína íþróttatakta.  Höfðu nokkrir foreldranna á orði að þeir hefðu ekki hreyft sig jafnmikið frá barnæsku og uppskáru harðsperrur fyrir vikið. Þegar allir höfðu leikið sér af lyst þá var farið inní skóla þar sem sagnameistarinn Berglind Agnarsdóttir lét móðan mása og allir hlustuðu af innlifun,- enda ekki annað hægt þegar magnaðar draugasögur er á ferðinni. Fleiri myndir.

(17.02.06) Bekkjarkvöld hjá 7. bekk

Miðvikudagskvöldið 15. febrúar var bekkjarkvöld hjá 7. bekk.  Tilefni var að bekkurinn hefur verið laus við einelti síðustu vikur. Strákarnir mættu sem hippar og stelpurnar sem 80´s gellur. Krakkarnir skemmtu sér mjög vel og kvöldið þótti takast vel.  Hér er nokkrar flottar myndir.

(13.02.06) Stofnun Foreldrafélags GF

Foreldrafélag Grunnskóla Fáskrúðsfjarðar var stofnað 7.febrúar 2006. Um 25% foreldra mættu og var hugur í fólki með þetta samstarf. Í undirbúningsnefnd voru foreldrar sem flest höfðu reynslu af svona starfi, og gáfu þau flest öll kost á sér í fyrstu stjórn.  Á fundinn mætti Maríanna Jóhannsdóttir varaformaður Heimili og skóla og sagði okkur frá: Hvers vegna foreldrafélag?  Einnig kynnti Lára Björnsdóttir fulltrúi í foreldraráði, hlutverk vað foreldraráðs.  Farið var yfir tillögu af lögum og þau samþykkt. Skólinn bauð okkur svo upp á kaffi og nýbakaðar kleinur sem 9. bekkur er að selja í fjáröflun fyrir vorferðalagi.

(9.02.06)  Heimsókn í Verkmenntaskóla Austurlands

Mánudaginn 6. febrúar fóru nemendur 9. og 10. bekkjar í heimsókn í Verkmenntaskóla Austurlands í Neskaupstað. Farið var með rútu strax kl. 8:00 um morguninn. Bæði  kennarar og nemendur í VA tóku vel á móti okkar fólki og kynntu skólann, bæði námsframboð og húsakynni. Voru nemendur GF fyrirmyndar gestir í alla staði og skólanum til sóma. Vonandi hafa þau bæði haft gagn og gaman af.

(1.02.06)  Íþróttadagar

Íþróttadagur verður hjá Miðstigi, 7. 8. 9. og 10. bekk fyrir hádegi fimmtudaginn 2. febrúar.  Hefðbundin kennsla verður eftir hádegi.  Föstudaginn 3. febrúar verður íþróttadagur hjá Yngsta stigi og elsta árgangi leikskólans frá 9:50 til 12:00.

Nemendur munið eftir viðeigandi klæðnaði.

Við bendum á að hægt verður að fylgjast með ráðsefnunni í beinni útsendingu á vefsíðu SAFT.

(1.02.06)  Myndmennt í 7.  og 8. bekk

Þessa dagana eru nemendur í 7. bekk að læra um Vincent van Gogh í myndmennt og nemendur 8. bekkjar um Leonardó da Vincí. Nemendurnir læra um lífshlaup þeirra og listaverk. Skoða myndir þeirra og skapa síðan sínar myndir í þeirra anda. Nú þegar eru komnar margar Stjörnunætur upp á vegg og Monu Lísur. Við höfum nýtt okkur frábæran listvef á vegum Námsgagnastofnunnar og hvetjum foreldra til að kíkja á http://www.namsgagnastofnun.is/norsk_kunstweb/

(1.02.06)  Ný tímatafla fyrir heimanám.

(25.01.06) Foreldradagur og aðgangur að upplýsingakerfinu Mentor

Þann 24. janúar var foreldradagur í skólanum. Nemendur fengu námsmat haustannar og spjall við umsjónarkennara sinn með foreldri. Foreldrar fengu afhent aðgangsorð og lykilorð að Mentor og þar geta þeir sé ástundun og einkunnir barna sinna,- námsáætlanir frá kennurum og jafnvel heimavinnuáætlanir. Einnig geta foreldrar séð ýmsar fréttir og tilkynningar eins og þessa hér sem sett var inn á Mentor líka. Foreldrar þurfa þó að athuga  að kennararnir eru enn að læra á kerfið og tileinka sér það og heimavinnuáætlanir og námsáætlanir koma smá saman inn.  Góða skemmtun við vafrið í Mentor.

(25.01.06) Bilun í tölvukerfi GF

Vegna bilunar í tölvukerfi GF hefur vefurinn www.gf.is legið niðri í 10 daga en nú á hann að vera komin aftur í gott lag.   Tölvupóstur GF bilaði einnig og því gæti einhver póstur sem sendur var til starfsmanna GF á tímabilinu 12.-18. janúar hafa tapast.

(10.01.06) Skólastarf GF  hófst af krafti 5. janúar og nú eru próf að hefjast

Nemendur GF mættu í skólann 5. janúar, endurnærðir eftir jólafríið en pínulítið syfjaðir eins og gengur í skammdeginu.  Starfsfólk GF hóf nýtt ár á því að sitja námskeið um námsmat, er það liður í þróunarverkefni sem nú er unnið að í skólanum.  Verkefnið gengur út að aðlaga námsmatið í GF betur einstaklingsmiðuðu námi.

Nýtt starfsfólk bættist í hópinn um áramót og eru það stuðningsfulltrúarnir  Sigurveig Rósa Agnarsdóttir og Helga Ósk Þórormsdóttir og sérkennarinn Ómar Ármannsson og eru þau boðin velkomin til starfa. 

Nemendur skólans eru nú 93, en 7 nemendur hafa bæst í hópinn eftir að skóli hófst s.l. haust.  Bjóðum við þessa nýju nemendur okkar sérstaklega velkomna og vonum að þeim líki vel hjá okkur.

Prófdagar eru framundan en þar sem námsmat í mörgum greinum fer fram jafnt og þétt yfir veturinn, breytist tímarammi stundatöflu ekki þessa daga.  Nemendur á unglingastigi taka í próf í kennslustundum samkvæmt töflu sem þeir hafa fengið í hendur.  Frítt er í heimanámstímana þessa viku og eru allir nemendur hvattir til að nýta þá aðstoð sem þar er í boði.

(03.01.06)  Gleðilegt nýtt ár!

Fyrsti skóladagurinn á árinu 2006 er fimmtudagurinn 5. janúar og hefst kennsla kl. 9:50.

Haust 2005

(15.12.05)  Litlu jólin

Þriðjudaginn 20. desember verða Litlu jólin haldin hátíðleg í Grunnskólanum. Börnin eiga að mæta kl: 8:00, þá ætlum við að skoða jólapóstinn, hlusta á jólasögu og dansa í kringum jólatréð.  Við ætlum að skiptast á jólagjöfum og því eiga börnin að koma með jólapakka (má kosta allt að 500 kr.). Skólinn býður upp á veitingar og nemendur mega koma með kerti.

(15.12.05)  Jólavinna og jólakvöld                                                                  myndir

Í desember hafa verið unnin ýmis verkefni tengd jólunum.  Yngstu nemendur skólans sóttu jólatré í byrjun desember ásamt elstu nemendum leikskólans. 

Á Yngsta  stigi hafa verið gerðar jólagrafíkmyndir, skrifaðar jólasögur, búin til jólakort og hlustað á jólasögur og jólatónlist.

Á Miðstigi  var unnið þemaverkefni um jólahald fjölskyldunnar og m.a. reiknað út hvað það kostar fyrir 5 manna fjölskyldu að halda jól. Nemendur á miðstigi settu saman hefti með ýmsum jólaverkefnum, bjuggu til jólakort og föndruðu.

Nemendur á unglingastigi nota tvo síðustu skóladagana fyrir jól til að vinna jólaverkefni; búa til konfekt, vinna jólakort, föndra og vera úti.

Þriðjudaginn 13. desember var hið hefðbundna jólakvöld GF haldið . Yngri nemendur spiluðu og horfðu á jólamynd og eldri nemendur spiluðu félagsvist og síðan drukku allir súkkulaði og borðuðu gómsætar kökur sem nemendur sjálfir höfðu bakað undir dyggri leiðsögn Ollu. Þetta form á jólakvöldi hefur skipað fastan sess undanfarin ár og er tilgangurinn að hafa það notalegt saman, nemendur og starfsfólk. Í ár kom beiðni frá útskriftarárgangi 05 um að fá að koma og vera með,- þau sögðust sakna grunnskólans síns svo mikið. Ekki var hægt að neita svo frómri ósk og spiluðu því með okkur margir af nemendum þeim sem útskrifuðust í vor.

(01.12.05)  Þjóðahátíð í GF                                                                                myndir

Síðastliðinn föstudag var haldin lítil þjóðahátíð í GF.  Þar voru nemendur að sýna afrakstur vinnu sinnar á þemadögum en þá var fjallað um fjölmenningu. Nemendur skreyttu skólann með ýmsum verkefnum,- plakötum, myndum og landakortum og einnig mátti heyra framandi tónlist, senjórítur voru á vappi og  sýndar voru myndir og myndbönd af nemendum við þemavinnuna. Allir hóparnir buðu upp á kræsingar að hætti annarra þjóða. Fjöldi fólks kom í heimsókn og kunnum við þeim hinar bestu þakkir fyrir.

(22.11.05)  Þemadagar

Miðvikudaginn 23. nóvember, fimmtudaginn 24. nóvember og föstudaginn 25. nóvember verða þemadagar í Grunnskóla Fáskrúðsfjarðar. Hefðbundin stundatafla og bekkjarskipting fellur niður og nemendum verður skipt upp í sex hópa en hver hópur vinnur með ákveðið land. Tveir kennarar vinna með hverjum hóp.

Tveir kennarar verða með hvern hóp. Löndin sem unnið er með eru: Bosnía, Spánn, Tæland, Pólland, Litháen og Austurríki.

Nemendur Yngsta stigs og Miðstigs verða í skólanum frá 8-12 miðvikudag og fimmtudag en frá 8-14 á föstudaginn. Nemendur í 7.-10. bekk verða í skólanum frá 8-12 og 13-14:30 á miðvikudag og fimmtudag og frá 8-14 á föstudeginum.

Athugið að á föstudaginn er sýning á afrakstri vinnunnar frá kl. 12-14 og verða nemendur að vera í skólanum á þeim tíma. Þá er opið hús og allir áhugasamir velkomnir í heimsókn í skólann.

(22.11.05)  Ferð 9. og 10. bekkjar með skólaskipinu Dröfn                              myndir

Fimmtudaginn 24.nóv. er nemendum í 9. og 10. bekk boðið í sjóferð með skólaskipinu Dröfn. Lagt verður úr höfn á Reyðarfirði kl. 09:00 -  og því farið héðan frá Fáskrúðsfirði uppúr kl.08:00. Heimkoma er áætluð um hádegi.

Á heimasíðu sjávarútvegsráðuneytisins má finna frekari upplýsingar um Dröfnina og fræðsluferðir hennar og á vefnum Fjaran og hafið má finna ýmislegt sem varðar lífríki hafsins.

Afar nauðsynlegt er að klæða sig MJÖG vel, í hlý föt.   Ekki gleyma húfu og vettlingum. Margir unglingar eiga "Kraftgalla" sem hafa reynst vel og gamla góða lopapeysan gerir alltaf kraftaverk gegn kulda svo og flísfatnaður.   Þeir sem eru sjóveikir verða að huga að plástrum eða pillum. Einnig þarf að vera vel búinn til fótanna.

(14.11.05)  Lego liðið Klettarnir vann til verðlauna

Liðið Klettarnir frá GF vann ein af sex verðlaunum sem veitt voru í legokeppninni First LEGO league sem haldin var í Garðabæ laugardaginn 12. nóvember.   Verðlaunin sem þau fengu voru veitt fyrir tæknivinnu.

Til hamingju með góðan árangur!

(14.11.05)  Danskennsla

Frá mánudeginum 14. nóvember til þriðjudagsins 22. nóvember verður danskennsla í félagsheimilinu Skrúð. Nemendur Miðstigs mæta í Skrúð alla dagana kl 8:00 og nemendur 7. bekkjar kl. 13:00. Nemendur Yngsta stigs verða í danskennslu kl 8:50 og fara í Skrúð með kennurum sínum. Nemendur þurfa að muna eftir að klæða sig vel þessa daga. Athugið að danskennslan er samkvæmt námsskrá og því skylda.

(10.11.05) Þátttaka GF í First LEGO league

Þann 12. nóvember verður fyrsta Lego keppnin  á Íslandi haldin.  Meðal þátttakenda er liðið KLETTARNIR frá GF skipað nemendum úr 8. og 9. bekk. Samtökin FFL á íslandi standa fyrir keppninni en stefna samtakanna er að efla raunvísinda-áhuga barna.  

Keppnin felst í að hanna, byggja og forrita LEGO vélmenni sem síðan á að leysa þrautir á þrautabraut en einnig á að vinna stutt rannsóknarverkefni og kynna það, á frumlegan og skýran hátt á keppnisdaginn.

Verkefnið er undirbúið hér í skólanum á þrautabraut. Á sjálfan keppnisdaginn þarf liðið að sýna hvernig vélmennið leysir þrautina og útskýra hvernig hönnun og forritun á að vinna. 

Keppnin stendur allan laugardaginn og á sama tíma verður einnig keppt á hinum Norðurlöndunum og stefnt er að því að hægt verði að fylgjast með keppninni á www.marel.is og ýmsar upplýsingar um keppnina er að finna á www.hjernekraft.org.

KLETTARNIR vilja koma á framfæri sérstökum þökkum til þeirra fyrirtækja sem hafa styrkt þá vegna ferðar í keppnina og til allra sem hafa aðstoðað þá við undirbúning keppninnar.

(08.11.05) Foreldra heimsóknir

Á næstu dögum fá foreldrar nemenda í GF boðsbréf, þar sem þeim verður boðið í heimsókn í skólann. Okkur langar til að foreldrar komi í heimsókn í kennslustundir og taki þátt í starfinu með okkur og barni sínu. Það er alltaf börnum fyrir bestu að sem best samband sé á milli heimila og skóla og viljum við með þessu efla enn frekar sambandið við foreldra. Að sjálfsögðu eru foreldrar alltaf velkomnir í heimsókn þó þeir fái sérstakt boðsbréf að þessu sinni. Foreldrar eru einnig beðnir um að svara sjálfsmatskönnun hjá skólaritara áður en þeir halda heim eftir heimsóknina.

(08.11.05) 7. bekkur kynnir Rauða krossinn

Nemendur 7. bekkjar luku í síðustu viku verkefni til kynningar á Rauða krossinum, verkefnið var unnið í samfélagsfræði. Afrakstur verkefnisins hangir uppi í anddyri skólans og þar geta gestir og gangandi kynnt sér það.  Þar er bæði hægt að lesa og hlusta á söguna af Henry Dunant, skoða veggspjöld um grundvallar-markmið Rauða krossins, starfsemi félagsins og síðast en ekki síst eru skýringar á táknum félagsins þ.e. rauða hálfmánanum og rauða krossinum.  Myndir frá vinnunni.

(08.11.05) Safnaferð Miðstigs

Föstudaginn 28. október fóru nemendur Miðstigs, Þórhildur Helga og Jóhanna Hauksdóttir í safnaferð á Eskifjörð.

Skoðuð var sýning Kristbjargar Ásgeirsdóttur og Ásmundar Sveinssonar. Guðmann Þorvaldsson tók á móti hópnum og veitti frábæra leiðsögn um sýningarnar. Nemendur unnu verkefni um sýninguna og virtust skemmta sér hið besta.

Hegðun þeirra var til fyrirmyndar og þau voru skólanum til mesta sóma. Hér má sjá nokkrar myndir sem teknar voru í ferðinni.

(28.10.05) Samvinna Kærabæjar og GF

Nú er að hefjast samstarf á milli grunnskólans og leikskólans Kærabæjar.  Krakkar úr Snillingahóp á leikskólanum koma í heimsókn til okkar á Yngsta stig og taka þátt í skólastarfinu.  Þeir munu ganga inn í venjulegt skólastarf og taka þátt í þeim verkefnum sem við erum að vinna hverju sinni.
Þrír nemendur af leikskólanum koma í einu og þrír nemendur frá okkur fara í leikskólann á sama tíma og ganga inn í starfið þar.  Í Snillingahópnum sem hefja mun skólagöngu í GF næsta skólaár eru 11 nemendur og 12 nemendur frá okkur fara í heimsókn á leikskólann.

Við á Yngstastigi hlökkum mikið til samstarfsins og vonum að það verði ánægjulegt fyrir alla.

(21.10.05) Heimsókn frá alnæmissamtökunum

Percy Stefánsson frá íslensku alnæmissamtökunum, kom í heimsókn til 9. og 10. bekkjar, þann 19. október.   Hann fræddi nemendur um HIV-smit og sjúkdóminn alnæmi en einnig um aðra kynsjúkdóma svo sem klamediu.  Benti hann á mikla aukningu klamediusmita hjá ungu fólki og brýndi fyrir nemendum að nota ávallt þær varnir sem dugað hafa best við kynsjúkdómum, þ.e. að nota smokk við kynmök.   Percy sagði einnig frá sinni sjúkdómasögu og erfiðleikum þeim sem hann hefur þurft að mæta vegna HIV-smitsins. 

Kunnum við Percy hinar bestu þakkir fyrir heimsóknina og fræðsluna.

(21.10.05) Heimsókn frá Heimili og skóla

Í vikunni kom Maríanna Jóhannsdóttir í heimsókn í skólann og hitti þar skólastýrur og nokkra foreldra.  Maríanna er í stjórn samtakanna Heimili og skóli og ætlar að aðstoða okkur við að stofna formlegt foreldrafélag við grunnskólann.  Þeir foreldrar sem hafa áhuga á að taka þátt í þeim undirbúningi eða að vera í stjórn félagsins er bent á að hafa samband við Eygló aðstoðarskólastýru.

(30.09.05)  Foreldrafundir

Síðustu vikuna hafa foreldrafundir verið haldnir í skólanum.

Umsjónarkennarar hittu þá foreldra nemenda í sínum umsjónarbekkjum. Rætt var um skólastarf vetrarins og ýmislegt sem viðkemur foreldrum í skólastarfinu. Þokkaleg mæting var á fundina, allt frá 50-100 %. Fengnir voru foreldrar til að vera svokallaðir tenglar við skólastarfið og verða þeir boðaðir á fund fljótlega. Foreldrar eru að sjálfsögðu alltaf velkomnir í heimsókn í skólann og hvetjum við þá til að vera duglega að koma og eiga samvistir með börnum sínum á þeirra vinnustað.

(30.09.05)  Bekkjarkvöld 7. bekkjar

(23.09.05)  Nýtt nemendaráð og Hattadagur!

Nú hefur verið skipað í nýtt nemendaráð fyrir skólaárið 2005-2006. Það skipa þau Björgvin Stefán, Tanja Rún, Ellen Rós, Þráinn, Heimir Jón og Eydís Lilja. Þau ætla að vera dugleg að standa fyrir alls konar uppákomum í vetur.

Ákveðið var að ríða á vaðið með Hattadegi, 20. sept.. Nemendur og starfsfólk mættu í skólann með alls kyns hatta og var mjög skrautlegt að líta yfir hópinn.

(13.09.05) Olweusarverkefnið gegn einelti

Starfsfólk Grunnskóla Fáskrúðsfjarðar er nú aftur komið á fullt í vinnu sinni í Olweusarverkefninu Gegn einelti, sem hófst síðastliðið haust.  Um 70 grunnskóla á landinu taka þátt í verkefninu.
Grundvöllur eineltisáætlunarinnar okkar er:

a)  Hlýja, einlægur áhugi á velferð barnanna og alúð
     hinna fullorðnu.

b)  Ákveðnir rammar eru gegn óviðunandi hegðun.

c)  Neikvæð viðurlög liggja við brotum á reglum - en
     þau eru hvorki niðurlægjandi né líkamleg

d)  Hinir fullorðnu í skóla og á heimili koma fram af
     myndugleik sem yfirboðarar.

Þessar meginreglur eru yfirfærðar á ýmsar aðgerðir í skólanum, sem allir starfsmenn læra. Við leggjum mikið upp úr því að endurskipuleggja ,,umhverfið” (félagskerfið) til að komið sé í veg fyrir að einelti þrífist og til að vinna gegn andfélagslegri hegðun.

Á komandi foreldrafundnum verða afhentir bæklingar sem eru upplagðir til að auka þekkingu foreldra á einelti og hjálpa þeim að öðlast betri skilning á líðan og gerðum barna sinna.

(26.08.05) Skólastarf GF  hafið

Skólaárið 2005-2006 hófst 24. ágúst.  Starfsfólk skólans kom þó töluvert fyrr til starfa og undirbjó skólaárið.   Nýtt starfsfólk er Margrét Sigurðardóttir, skólaritari og Elsa Sigrún og Guðrún Íris kennarar og eru þær boðnar velkomnar til starfa. 

Nemendur skólans eru nú 87 og hefur því heldur fækkað en þó ekki eins og búist var við í vor.  Í vor útskrifaðist stór árgangur en mjög lítill árgangur kemur inn í fyrsta bekk. Til stóð að það væri einungis eitt barn en hefur nú teygst upp í fjögur.  Einnig hafa þónokkrir nemendur verið skráðir inn í skólann frá öðrum skólum.  Bjóðum við alla þessa nýju nemendur okkar sérstaklega velkomna og vonum að þeim líki vel hjá okkur. 

Einkunnarorð okkar eru ánægja, ábyrgð, árangur og áhugi og vonum við að allir sem að skólastarfinu koma í vetur tileinki sér þessi orð í starfi og leik. 

Nýtt og breytt leiksvæði
Miklar breytingar hafa orðið á útileiksvæði nemenda.  Til viðbótar við gervigrasvöllinn eru komnar nýjar rólur, snúningstæki og klifurtæki og kastalinn hefur verið færður inn á aðalleiksvæðið.  Vonum við að þessi viðbót leiktækja og endurnýjun verði nemendum til gagns og gleði.

Krafttímar
Skipulag skólastarfs verður með venjubundnum hætti nema að kennarar á unglingastigi eru að þróa svokallaða krafttíma í stærðfræði, íslensku og náttúrufræði.  Samtals eru það 8 kennslustundir á viku sem 7. -10 bekkur er saman í stofu og þá með 3-4 kennara til aðstoðar.  Þessir tímar eru hugsaðir líkt og stoðtímarnir í Menntaskólanum á Egilsstöðum eða áformstímarnir á Miðstigi, þ.e. nemendur eiga að vera að vinna í sínu efni, hver á sínum hraða og kennararnir eru til aðstoðar.  Þar sem þetta eru vinnutímar þá ætti aldursdreifing nemenda ekki að skipta máli frekar en á flæðilínunni í frystihúsinu, því hver vinnur að sínu.  Auðvitað koma upp vandamál í þessu kennslufyrirkomulagi eins og í öðrum en þá höfum við aukastofur sem nemendur geta farið í og unnið.  Þeir nemendur sem leggja sig fram í þessu ættu að geta fleytt sér vel áfram og með dugnaði t.d. minnkað heimanám sitt.  Eins og fyrr segir er krafttímarnir í þróun og kennslufyrirkomulagið getur því tekið breytingum. 

Ávextir- grænmeti- mjólk
Sem fyrr geta nemendur gerst áskrifendur af mjólk eða/og ávöxtum og grænmeti í nestistímum.  Hafa þarf samband við ritara skólans milli kl 8-12 til að skrá nemendur í þessa hollustu.  Nemendur sem skulda frá fyrra ári þurfa að gera upp skuld sína áður en hægt er að gerast áskrifendi að nýju.  Einnig getur þurft að koma til þess að hætta að bjóða áskrift fyrir ákveðna hópa ef umgengni um nestið í nestistímum er slæm.

Valfög
Valgreinar hjá 9. og 10. bekk eru tónlist, handavinna, hringekja, stærðfræði og íþróttafræði.  Hver nemandi þarf að velja þrjú fög og hefst kennsla í þeim vikuna 29. ágúst- 2. september.

(15.08.05)  Tilkynning til nemenda og foreldra

Nemendur mæti í skólann miðvikudaginn 24. ágúst kl. 10:00.

Afhentar verða stundaskrár, bækur og innkaupalistar vegna námsgagna.  Kennsla hefst samkvæmt stundaskrá fimmtudaginn 25. ágúst.  Foreldrar nemenda sem nýfluttir eru í bæinn eru hvattir til að skrá börnin í skólann hið fyrsta. Skólastýrur og ritari verða við í skólanum frá mánudegi 15. ágúst.

(15.08.05)  Hjól og hjálmar

Nemendur og foreldrar. Vinsamlegast athugið að einungis má koma á skólalóðina á hjólum hverskonar með lögmætan öryggisbúnað. Semsagt....upp með hjálmana.
 

vor 2005

(03.06.05) Skólaslit

Þriðjudaginn 31. maí voru skólaslit. Þau voru haldin í félagsheimilinu Skrúð og var góð mæting nemenda og foreldra. Nemendur í forskóla fluttu tónlistaratriði og skólahljómsveitin spilaði. Allir nemendur fengu einkunnarblöð sín og þó nokkrir fengu viðurkenningar fyrir góða ástundun og mætingu. Að þessu sinni voru 17 nemendur sem útskrifuðust úr 10. bekk. Fengu þeir skírteinin sín og rós frá skólanum. Vonum við starfsfólk grunnskólans að þeim vegni vel í vegferð sinni um lífið. Eftir skólaslitin var hátíðarkvöldverður og dansleikur sem nemendur 10. bekkjar skipulögðu og þar mættu nemenudur úr  8.-10. bekk skólanna  í Austurbyggð. Heppnaðist sú samkunda hið besta.

(28.05.05)   Vordagar

Þessa dagana standa yfir svokallaði Vordagar. Þá leggja nemendur og kennarar frá sér hefðbundið námsefni og einnig er hið venjubundna bekkjarkerfi stokkað upp. Nemendum er skipt í 6 hópa og í hverjum hóp eru nemendur frá öllum árgöngum skólans,- þ.e. saman í hóp eru nemendur frá 6 til 16 ára. Unnið er með náttúruþemun: Urð og grjót, Fjaran, Veður, Skordýr, Gróður og Vatn. Hver nemendahópur vinnur með tvö af þessum þemum. Fjölbreytni einkennir vinnuna með hvert þema og er m.a. farið út í Árhöfn í fjöruferð, gengið á Kjappeyrarmúla, byggðir sandkastalar inn á Leiru, settar upp skordýragildrur, búnar til gróðurmyndir, flugdrekar smíðaðir og farið í vatnsblöðruslag. Á vordögum er einnig leikja og hjóladagur en þá fara nemendur og starfsfólk í leiki, t.d. boðhlaup og fílafótbolta.  Slysavarnardeildin Hafdís setur upp hjólreiðaþraut og lögreglan kemur og skoðar hjól.